ရခိုင်ကမ်းရိုးတန်း ဆိပ်ကမ်းမြို့ (၃)မြို့တွင် ရေကြောင်းရဲတပ်ဖွဲ့ အခြေစိုက်ရန် စတင်ပြင်ဆင်

ရခိုင်ကမ်းရိုးတန်း၏ ဆိပ်ကမ်းမြို့ (၃)မြို့၌ ရေကြောင်းရဲတပ်ဖွဲ့များ အခြေစိုက်ရန်အတွက် စတင်ပြင်ဆင်နေပြီဖြစ်ကြောင်း သတင်းရရှိသည်။

လက်ရှိတွင် စစ်တွေနှင့်ကျောက်ဖြူမြို့တွင် အခြေစိုက်ရန်အတွက် ရေကြောင်းရဲတပ်ဖွဲ့များ ၏ ရေကြောင်း ရဲတပ်ဖွဲ့ရုံး မြေနေရာများ စတင်ရှာဖွေ နေပြီဖြစ်ကြောင်း ရေကြောင်းရဲတပ်ဖွဲ့မှ တာဝန်ရှိသူတစ်ဦး က ပြောကြားသည်။

လက်ရှိအချိန်ထိ ရေကြောင်းရဲတပ်ဖွဲ့ ရုံးစိုက်ရန် ရုံးမြေနေရာ ရှာဖွေနေဆဲဖြစ်ပြီး ရေကြောင်းရဲတပ်ဖွဲ့၏ လုပ်ငန်းများ ဆောင်ရွက်ခြင်း မရှိသေးကြောင်းနှင့် ရုံးမြေနေရာများ ရရှိလာပြီဆိုလျှင် ပင်လယ်ပြင်လုံခြုံရေး စိုးမိုးရေးအား ရေကြောင်းရဲတပ်ဖွဲ့မှ တာဝန်ယူလာ နိုင်တော့မည်ဟုလည်း သိရသည်။

ရခိုင်ပဋိပက္ခများ စုံစမ်းစစ်ဆေးရေး ကော်မရှင် အစီရင်ခံစာတွင် "တပ်မတော် ရေတပ်အင်အား တိုးချဲ့ချ ထားရန်၊ ကမ်းခြေစောင့် ရေဒါစခန်းများ၊ ကင်းလှည့်လေယာဉ်များ၊ CCTV စောင့်ကြည့်ကင်မရာများ၊ လူလုပ်အတားအဆီးများ ချထားရန်၊ ကမ်းခြေစောင့် ရေကြောင်းရဲတပ်ဖွဲ့ (Marine Police / Coastal Police) ကို ဖွဲ့စည်း၍ Assault Boat ကင်းလှည့်တိုက်ခိုက်ရေး ရေယာဉ်များကို ထုတ်ပေးထားပြီး ရေတပ်နှင့် ပူးပေါင်းကင်းလှည့်ခြင်းများ ဆောင်ရွက်စေရန်" ဟု အကြံပြုထားသည်။

ရေကြောင်းရဲတပ်ဖွဲ့နှင့် စပ်လျဉ်း၍ ရခိုင်ပြည်နယ်၌ ရေကြောင်းရဲတပ်ဖွဲ့ခွဲ တစ်ခုကို ကျောက်ဖြူ ဆိပ်ကမ်း တွင် လည်းကောင်း၊ ရေကြောင်းရဲတပ်ဖွဲ့ နှစ်စုကို စစ်တွေနှင့် သံတွဲဆိပ်ကမ်းများတွင်လည်းကောင်း ဖြန့်ခွဲ ဆောင်ရွက်သွားမည်ဟုလည်း သိရသည်။

ရေကြောင်းရဲတပ်ဖွဲ့ခွဲ သုံးခုကို ရန်ကုန်၊ ကျောက်ဖြူ၊ ထားဝယ်မြို့များတွင်ရှိသည့် ဆိပ်ကမ်းများနှင့် ရေကြောင်း ရဲတပ်ဖွဲ့စု ရှစ်ခုကို ပုသိမ်၊ မော်လမြိုင်၊ စစ်တွေ၊ သံတွဲ၊ မြိတ်၊ ကော့သောင်း၊ မန္တလေးနှင့် ၀မ်ပုံ (မဲခေါင်) မြို့များတွင် ဖွဲ့စည်းမည်ဟုလည်း သိရသည်။

ရေကြောင်းရဲတပ်ဖွဲ့၏ တာဝန်များတွင် လူကုန်ကူးမှု၊ လက်နက်မှောင်ခိုမှု၊ မူးယစ်ဆေးဝါး သယ်ဆောင်ရောင်း ၀ယ် မှု၊ ပင်လယ်ဓားပြမှုများ၊ နိုင်ငံနှင့် ဆက်စပ်နေသည့် ရေလမ်းကြောင်းများမှတစ်ဆင့် ကျူးလွန်လာသည့် မှုခင်းများကို တားဆီးနှိမ်နင်းရန်နှင့် တရားဥပဒေစိုးမိုးရေး လုပ်ငန်းများကို ဆောင်ရွက်ရန်တို့ ပါဝင်ကြောင်း သိရသည်။

"ရေကြောင်းရဲတပ်ဖွဲ့များဟာ ရေပြင်နယ်နိမိတ်အတွင်း ရေကြောင်းလမ်းကို အသုံးပြုပြီး ကျူးလွန်လာတဲ့ ပြစ်မှုများကို တားဆီးဖော်ထုတ်ခြင်း၊ အိမ်နီးချင်းနိုင်ငံ ရဲတပ်ဖွဲ့များနဲ့ နယ်နိမိတ်ဖြတ်ကျော် မှုခင်းများအတွက် ညှိနှိုင်းဆောင်ရွက်ခြင်း၊ ပင်လယ်ပြင် နယ်နိမိတ်နဲ့ မြစ်ကြောင်းများအတွင်း ဖြစ်ပွားသည့် အကြမ်းဖက်မှုများကို တန်ပြန်နှိမ်နင်းခြင်း၊ သဘာဝဘေးအန္တရာယ်ဒဏ် ခံရသူများနဲ့ ရေဘေးဒုက္ခသည်များကို ရှာဖွေကယ်ဆယ် စောင့်ရှောက်ခြင်းများကို ဆောင်ရွက်နိုင်ရန်အတွက် ဖြစ်ပါတယ်" ဟု စစ်တွေရေကြောင်း ရဲတပ်ဖွဲ့မှ တာဝန်ရှိသူတစ်ဦးက ပြောကြားသည်။

"ရခိုင်ကမ်းရိုးတန်းဟာ လူခိုးဝင် ခိုးထွက်လုပ်နေတဲ့ ဘင်္ဂလားဒေ့ရ်ှနိုင်ငံနဲ့ ရေပြင်၊ မြေပြင် ထိစပ်နေတာ ဖြစ်တယ်။ ဒီအတွက် နယ်စပ်မြစ်နဲ့ ပင်လယ်ပြင် လုံခြုံဖို့အတွက် ရေတပ်သာမက ရေကြောင်းရဲတပ်ဖွဲ့ဟာ လိုအပ်ပါတယ်။ အခုစစ်တွေမှာ ရေကြောင်းရဲတပ်စုလို့ပဲ သိရတဲ့အတွက် ဒီထက်ပိုအင်အားတိုးပြီး နတ်မြစ်တစ်လျှောက် လုံခြုံရေးတွေကိုပါ ဆောင်ရွက်နိုင်အောင် ခေတ်မီလက်နက် ကိရိယာတွေအပြင် ဘင်္ဂလားဒေ့ရ်ှမှာလို မြန်နှုန်းမြင့် စပိဘုတ်တွေ တပ်ဆင်ထားဖို့ လိုပါတယ်" ဟု မောင်တောမြို့ခံတစ်ဦးက ပြောကြားသည်။

လွန်ခဲ့သည့် သုံးနှစ်ခန့်က မောင်တောမြို့နယ်အတွင်းရှိ ကျေးရွာများ၊ ရသေ့တောင်မြို့နယ်၊ မယူကမ်း ကျေးရွာများကို ဘင်္ဂါလီ ဓားပြအဖွဲ့တစ်ဖွဲ့က ဓားပြတိုက်၊ န.စ.က တပ်ဖွဲ့များကို ၀င်ရောက်စီးနင်းမှုများ ဖြစ်ခဲ့ဖူးပြီး မယူတောင်ကို ကျော်ဖြတ်၍ ရေကြောင်းမှတစ်ဆင့် ပုန်းလျှိုးပျောက်ကွယ် သွားကြကြောင်း၊ ထို့အပြင် ကျွဲနွားများကို လုယူခြင်း၊ ငါးခိုးဖမ်းခြင်း၊ မူးယစ်ဆေးဝါးများ ရောင်းဝယ်ခြင်းတို့ ရှိခဲ့ကြောင်း သိရသည်။

ရခိုင်ပြည်နယ် စစ်တွေမြို့တွင်လည်း လွန်ခဲ့သည့် နှစ်လေးငါးဆယ်ခန့်က ရေတပ်အပြင် ရေကြောင်းရဲများ၊ အကောက်ခွန်ကင်းလှည့် ရေယာဉ်များ ထားရှိခဲ့ဖူးကြောင်းလည်း သိရသည်။

၂၀၁၂ ခုနှစ် ဇွန်လပဋိပက္ခ ဖြစ်ပွားပြီးနောက်ပိုင်း မြန်မာနိုင်ငံ ရဲတပ်ဖွဲ့က ၂၀၁၂ ခုနှစ် ဇူလိုင် ၉ ရက်တွင် ရေကြောင်းရဲတပ်ဖွဲ့ကို ဖွဲ့စည်းခဲ့သည်ဟု သိရသည်။

Credit: Tanintharyi News
Photo: ရဲဇာနည်